تیمی تۆیۆتا گازوو ڕەیسینگ (TGR) سەرکەوتنێکی دووانی لە ڕاڵی سەفاری کینیا بەدەستهێنا، کاتێک تاکامۆتۆ کاتسۆتا و یاریدەدەرەکەی ئارۆن جۆنستۆن توانییان پلەی یەکەم بەدەستبهێنن بە ئۆتۆمبێلی تۆیۆتا GR یارس ڕالی 1 ژمارە 18. بەمەش تیمەکە لەسەر تۆمارە بێ شکستەکەی لەم پێشبڕکێ دێرینە ئەفریقییەدا بەردەوام بوو. لە هەمان کاتدا، هەریەک لە سامی پاجاری و یاریدەدەرەکەی مارکۆ سالمینین بە پلەی سێیەم چوونە سەر سەکۆی سەرکەوتن بە ئۆتۆمبێلی تۆیۆتا GR یارس ڕالی 1 ژمارە 5.
بەهۆی ئەم سەرکەوتنەوە، کۆمپانیای تۆیۆتا بە جیاوازی 43 خاڵ لە پێشەنگی ڕیزبەندی بەرهەمهێنەراندایە دوای کۆتایی هاتنی گەڕی 4ـەمی پاڵەوانێتی ئەم وەرزە. لە کاتێکدا شۆفێرانی تیمی تۆیۆتا گازوو ڕەیسینگ بەردەوامن لە داگیرکردنی 3 پلەی یەکەمی ڕیزبەندی شۆفێران. ئەمە 6ـەمین سەرکەوتنی تیمەکەیە لە ڕاڵی سەفاری کینیا لەوەتەی ئەم چالاکییە لە ساڵی 2021دا گەڕاوەتەوە بۆ ناو پاڵەوانێتییەکە، و 14ـەمین دەستکەوتی تۆیۆتایە لە مێژووی بەشدارییەکانی لەم ڕاڵییە ئەفسانەییەدا.
ئاکیۆ تۆیۆدا، بەڕێوەبەری کارگێڕی تیمی تۆیۆتا گازوو ڕەیسینگ (TGR) وتی: "هەمیشە هیوام دەخواست کە شۆفێرێکی ڕاڵی یابانی توانای سەرکەوتنی جیهانی هەبێت و ببێتە سەرچاوەی ئیلهام بۆ منداڵان و گەنجانی یابان. کە هەمیشە بەدوای نموونەیەکی باڵادا دەگەڕێن نەک تەنها بۆ ئەوەی وەک ئەو بن، بەڵکو بۆ ئەوەی لە کاروانی ئەو تێپەڕێنن و لە داهاتوودا دەستکەوتی گەورەتر بەدەستبهێنن، بێگومان ئەو نەوانەی کە دەیانەوێت لە تاکامۆتۆ باشتربن ئاستی وەرزشی ئۆتۆمبێل لە یابان بەرز دەکەنەوە. ئەم سەرکەوتنە دیارییەکی گەورەیە بۆ ئەو منداڵ و گەنجانە. سوپاس بۆ تۆ تاکامۆتۆ! دەمەوێت ببیتە سەرچاوەی ئیلهامی گەورەتریش، و چاوەڕێی نمایشێکی نوێ دەکەین لە ڕاڵی ژاپۆن!"
تۆیۆدا ئاماژەی بەوەش کرد: "پێشبڕکێیەکی سەختمان لەگەڵ شۆفێرەکانی تر هەبوو. دەتوانین لە ئەزموونی ڕاڵی سەفاری فێر ببین و وانەکان بەکاربهێنین بۆ ئەوەی لە جارەکانی داهاتوودا هەمووان بچنە سەر سەکۆی سەرکەوتن. من دڵنیام لە توانای تیمەکە بۆ بەدیهێنانی ئەم ئامانجە."
کاتسۆتا بوو بە 2ـەم شۆفێری ژاپۆنی کە سەرکەوتن لە یەکێک لە خولەکانی پاڵەوانێتیی جیهانی ڕاڵیی (WRC) بەدەستبهێنێت، دوای سەرکەوتنەکانی کینجیرۆ شینۆزۆکا لە ڕاڵیی کەناری عاج لە ساڵانی 1991 و 1992. هەروەها بوو بە 2ـەم شۆفێری ژاپۆنی کە ڕاڵیی سەفاری بباتەوە دوای یۆشیۆ فوجیمۆتۆ کە لە ساڵی 1995 بۆ تۆیۆتا سەرکەوتنی بەدەستهێنابوو.
کاتسۆتا دوای پێشکەشکردنی ئاستێکی بەهێز لە ڕاڵی سوید بەشداری لە وەرزەکەی ئەمساڵدا کرد، کە تێیدا کێبڕکێی لەسەر پێشەنگی کرد و پێشبڕکێکەی لە پلەی دووەمدا کۆتایی پێهێنا. لە کینیاش سەرەتایەکی بەهێزی نیشاندا و لە قۆناغە سەرەتاییەکاندا لە پێشەنگەوە نزیک بوو، دواتر توانی هەنگاو بە هەنگاو پێشبکەوێت لەگەڵ زیادبوونی ئاڵەنگارییەکان بۆ شۆفێر و ئۆتۆمبێلەکان، ئەمەش بە پشتبەستن بە شێوازە هاوسەنگەکەی و ئاستە جێگیرەکەی لە قۆناغە سەختەکانی ڕاڵی کینیادا. لەگەڵ بەرەوپێشچوونی ڕاڵییەکە، کاتسۆتا پێشەنگی گرتە دەست و بەردەوام بوو، پێش ئەوەی قۆناغە کۆتاییەکان بە دانایی بەڕێوە ببات و سەرکەوتنەکە بە جیاوازی 27.4 چرکە لەگەڵ جۆنستۆنی یاریدەدەری بەدەست هێنا.
لەلایەکی دیکەوە، پاجاری و سالمینین ئاستێکی بەهێزیان لە قۆناغە جیاوازە سەختەکاندا پێشکەش کرد. توانییان بە بەهێزی بگەڕێنەوە و قەرەبووی ئەو کاتە بکەنەوە کە لە سەرەتای پێشبڕکێکەدا لەدەستیان دابوو، دواتر سەرکەوتنیان لە یەکێک لە قۆناغەکاندا تۆمار کرد و دووبارە ڕێگەی خۆیان بەرەو پلەی سێیەم بڕی. ئەمە بە دووەم سەرکەوتنی لەسەریەکی پاجاری و سێیەم سەرکەوتنی دادەنرێت لە کۆی پێنج بەشداری لە پاڵەوانێتییەکەدا لەگەڵ تیمەکەدا.
لە ماوەی ساڵانی ڕابردوودا کۆمپانیای تۆیۆتا بەشداری لە چەندین ڕووداوی وەرزشی ئۆتۆمبێل کردووە، لەوانە فۆرمۆلا وەن، پاڵەوانێتی جیهانی بەرگەگرتن (WEC) و پێشبڕکێی بەرگەگرتنی 24 کاتژمێری "نوربۆرگرینگ". بەشداریکردنی تۆیۆتا لەم چالاکییانەدا لە ڕێگەی تیم و لایەنە جیاوازەکانی ناو کۆمپانیاکە ئەنجامدرا تا مانگی نیسانی 2015، کاتێک تۆیۆتا کۆمپانیای گازۆ ڕەیسینگی دامەزراند، کە هەموو چالاکییەکانی وەرزشی ئۆتۆمبێلی لە ژێر یەک ناودا چەسپاند. دروشمی تۆیۆتا کە "رێگاوبانەکان خەڵک بنیات دەنێن"، تیشک دەخاتە سەر ڕۆڵی وەرزشی ئۆتۆمبێل وەک پایەیەکی بنەڕەتی پابەندبوونی کۆمپانیاکە بۆ پەرەپێدانی ئۆتۆمبێلی هەمیشە باشتر. بە سوود وەرگرتن لە ئەزموونی ساڵانێک کە لە ژێر بارودۆخی توندی پێشبڕکێ جۆراوجۆرەکانی وەرزشی ئۆتۆمبێل بەدەستی هێناوە، تیمی GR ئامانجیەتی تەکنەلۆژیای پێشەنگ و چارەسەری نوێ پەرەپێبدات کە ئازادی و سەرکێشی و ئەزموونی شۆفێری بۆ هەمووان ببەخشێت.
قۆناغی داهاتوو بریتییە لە خولی 5ـەمی پاڵەوانێتیی جیهانی ڕاڵی ساڵی 2026 کە لەلایەن فیدراسیۆنی نێودەوڵەتی ئۆتۆمبێل (FIA) ڕێکدەخرێت و لە ڕاڵی کرواتیادا بەرجەستە دەبێت. ئەم ڕاڵییە لە ماوەی 9 بۆ 12ی نیسان بەڕێوەدەچێت، دوای ئەوەی پاش ساڵێک دابڕان گەڕایەوە بۆ خشتەی پاڵەوانێتییەکە، ئەوەش لە بارەگا نوێیەکەی لە شاری ڕیکا. ڕووداوەکانی ڕاڵییەکە لەسەر ڕێڕەوەی قیڕ سەختەکان ئەنجام دەدرێن کە تێکەڵەیەکە لە بڕگە خێرا و هونەرییەکان، لەگەڵ گۆڕانی بەردەوام لە دۆخی ڕووی ڕێگاکە و ئاستی جێگیری لێخوڕیندا.
ئۆتۆمبێلی تۆیۆتا GR یارس ڕالی1 ژمارە 18 (تاکامۆتۆ کاتسوتا و ئارۆن جۆنستۆن)
پلە: یەکەم
کات: 3 کاتژمێر و 16 خولەک و 5.6 چرکە
ئۆتۆمبێلی تۆیۆتا GR یارس ڕالی1 ژمارە 5 (سامی پاجاری و مارکۆ سالمینێن)
پلە: سێیەم
کات: 3 کاتژمێر و 20 خولەک و 31.7 چرکە (+4 خولەک و 26.1 چرکە جیاوازی)
- کۆتایی -
